تعبت من الكلام الكتير

تعبت من الكلام الكتير

مش عارفه بقيت بحس ان اغلبية الناس بتتكلم و بس
امة كلام لا افعال لدرجة انى زهقت من نفسى
لانى مش قادرة اعمل شئ و بحاول اتكلم و بس
هو ممكن يكون الكلام جزء من محاولة حل المشكلة لكن لامتى
هنفضل نتكلم و ساعات كتير تلاقى ناس عماله تتكلم من بره
و لما تحاول تدور على للى جواهم تلاقي كلامهم غير افعالهم
و كل للى اتقال مجرد كلام
وصلت لمرحلة انى بقيت بكره الناس
و مش اى حد ممكن اصدقه بالساهل
هتقولوا انتى كده بتظنى سئ بالناس
هقولكم يمكن بس لما تلاقى انك فى مكان
الفساد و جبروت الظلم انتشر يبقى من حقك
انك تحرص بالقوى ومش تصدق اى كلام يتقال لك
هتقول الناس فيها الكويس و فيها الوحش مش كل الناس ظالمة و لا وحشه
ماشى تمام معاكم بس ليه دايما تلاقى الشر صوته عالى

و بيستخدم كل الاسلحة المتاحة ليه سواء مشروعة او غير مشروعة

و الناس للى جواهم خير تهزمهم سلبيتهم حتى ابسط اسلحتهم المشروعة مش بيستخدموها
ليه الجبن و الخوف من الشر طالما انت على حق ليه تسكت و انت شايف ظلم لبرئ و انت فى ايدك تساعده
لغاية امتى هنفضل زى ما احنا نتحول للاسؤ و الاسؤ
الكلام لوحده مش بيجيب نتيجة لازم نحاول نعمل حاجه و نساعد بعض على الصح

كلمح البصر

تمر الايام كلحظات بين يدى الانسان و معها تمر السنوات كلمح البصر
مرت السنوات بدون ان اشعر بمرورها مرت سريعا و خفيفة علمتنى الكثير و الكثير
لم تكن كلها سعيدة و لم تكن كلها حزينة كانت بين تلك و ذاك
و ها هى مرت ثلاث سنوات على تخرجى كلمح البصر
و مازلت اتذكر احلى سنوات عمرى الوردية
و ذكرياتي محفورة بداخلى كانها الامس القريب
افترق البشر و لم تظل الا الذكريات التى اتذكرها و ابتسم
ابتسم لطفولة قلبى و احلامى البريئة الوردية
باستقبال عالم مبتسم و مشرق قد يشوبه بعض الكره و الضغينة
فانها الدنيا تحمل كل المعانى من الخير و الشر
فالخير منها قل و الشر منها انتشر
و لكن مازال الخير موجود بالرغم من كل شئ
مرت ثلاث سنوات خفيفة تعلمت فيها الكثير
و تغيرت خلالها كثيرا لم اكن اتخيل انى هختلف عن ايام الكلية
حتى طريقة تفكيرى اختلفت نظرتى للبشر اختلفت
هل من الممكن بمرور السنوات يتغير الانسان
و يتغير معها طريقة تفكيره .
يارب يكون التغيير للاحسن
و الطف بينا فى مستقبلنا لو فى العمر بقية
و ارزقنا حسن الخاتمة و الجنة

طيور النورس

ذكريات الاقصر و اسوان

الاقصر و اسوان
من اجمل الرحلات للى طلعتها
الاقصر مافيش فيها حته مافيهاش اثار و لا معابد
معبد الاقصر هتلاقى فيه عصور مختلفة مرت بيه من فرعونية لرومانية لقبطية لاسلامية
معبد الكرنك و طريق الكباش و بهو الاعمدة الكبير جدا
و الصوت و الضوء فى معبد الكرنك روعة بصوت سميحة ايوب
و وادى الملوك و الجبال الروعة للى فيه
و عجبنى قوى مقبرة كانت عالية جدا بنطلع لها بسلم عالى قوى
و ندخل بعدها فى فتحة جوه الجبل
و فى الممرات نقوش ملونة محتفظة بالوانها
و فى الاخر نشوف موميا محتفظة بشكلها
و رحنا كمان معبد حتشبسوت و ركبنا الطفطف
و شفنا كمان ثمثالين نم نم فى الطريق لوادى الملوك
حكايتهم ظريفة و اتصورنا معاهم كمان
و اكلنا من العيش الشمسى و الفايش
و شفنا متحف الاقصر كان روعة
و رحنا على اسوان و فى طريقنا
رحنا معبد ادفو و معبد تانى مش فاكرة اسمه
و بعدها وصلنا لاسوان
و منظر النيل هناك مختلف جدا مافيش منظر طبيعى اجمل منه
جو جميل جدا و طبيعة سبحان الخالق
اول مرة فى حياتى احب النيل بالطريقة دى
مع انى شفته من اول دمياط مرورا بالقاهرة الى الاقصر
فى اسوان شكل تانى سبحان الله
وسع النيل هناك كبير جدا و المياه نقية و رايقة
و منظر الصخور و الخضرة وسط النهر روعة
و منسناش نروح السد العالى و حظنا اننا عرفنا ندخله من جوه
و شفنا رمز الصداقة و اتصورنا عنده
و لا جزيزة النباتات فيها حاجات نادرة و الطبيعة فيها خلابة سبحان الله
و رحنا معبد فيلة و قالوا لنا انه اتنقل من مكانه الاصلى
و رحنا كمان جزيرة سهيل قريبة من سد اسوان القديم
جزيرة فى وسط النيل و طلعنا الجبل بتاعها و كان منظر تحفه
و شفنا قبر الخامان بس كان مقفول للاسف مدخلتوش
و احلى حاجه بقى مطعم النوبة ده كان مطعم فى جزيرة فى النيل
كنا بنروح ليه كل وقت عذاء نتغدى فيه
كان مطعم غير ان طعم الاكل فيه حلو
بس كان بطابع نوبى و فيه كل للى نفسك نشوفه و تشتريه بطابع نوبى
و عملوا لينا حفلة نوبى لاستقبالنا فى اول يوم كانت جميلة جدا
و طبعا مش ممكن نكون فى اسوان من غير ما نجيب الفول السودانى و الملوحة و كل للى نفسنا فيه من توابل و عطاره

و لابيهمنــــــــــــــى

و لابيهمنــــــــــــــى

كلمة بقيت بقولها كتير على غير العادة
و لا بيـهمنـــــــــــــى
حاسه انى بقيت بيعه القضية
بعمل اللى انا عايزاه و خلاص
هاخد ايه من الكلام الكثير غير وجع القلب
و ده قال و ده مقلش
مادام للى بعمله ميغضبش ربنا منى
يبقى ولا يهمنى
هاخد منها ايه يعنى

و انا مش عايزة حاجه منها
كبتها و عشت حياتى
و الحمد لله على كل حاجه
هى عيشة و لا اكثر
الواحد هيعيش مرة واحدة
لو معشهاش صح زى ما هو عايز هعيشها امتى

و لا بيهمنى رضا الناس لان رضا جميع الناس صعب
فاذا حاولت ارضاء الناس بدون ارضاء لنفسك خسرت نفسك و لن ترضى الناس بعدها ايضا
بل تجد ان عملك لن يرضيهم بالرغم من محاولة ارضائهم

و لا بيهمنى حد و لا بخاف من حد
لو عملت كذا هيزعل منك فلان و ممكن يضرك
مش فاهمين ان لو اجتمع الناس على ان يضروك بشئ لن يضروك بشئ الا قد كتبه الله لك
و ان مش بحب لوى الدراع

و لا بيهمنى عادات و لا تقاليد
فكثيرا منها خطأ و لا اساس له من الصحه
ما يهمنى هو الله و هل هذا العمل يرضى ربى ام لا

و لا بيهمنى الحياة فكل ما فيها فانى
اللهم اجعل الحياة زيادة لي في كل خير واجعل الموت راحة لي من كل شر