شاهدت و سمعت فى الميكروباص

شاهدت و سمعت فى الميكروباص خلال عودتى من عملى موقفين فى الميكروباص

الاول :الشوارع خاليه و الجو برد و كل الناس فى بيوتها و الميكروباص هادى

و السائق مشغل قران كريم بصوت شيخ هادى و لا يزعجنى غير صوت بنتين فى المقعد خلفى

لاحظت صوتهم العالى الذى يغطى على صوت القران و الذى يسمعه كل من فى الميكروباص

و سمعت حوارهم بالصدفة الفتاه الاولى : متسمعيش كلام حماتك و لازم تعرفيها ان محدش بيتحكم فيكى

الفتاه الثانيه : ازاى

الفتاه الاولى : يعنى مثلا عندك انا النهاردة كنت عند حماتى مع خطيبى و قعد يزعق لى

و يقول لى مترمى بقى البنطلون ده و لا اقطعيه مافيش غير الضيق ده

قلت له اه مافيش غيره معنديش حاجه تانيه قالى طب مافيش حاجه طويلة عليه

قلتله لا و كل ده قدام حماتى هو كان عايز يعمل كده قدامها

بس انا مسكتلوش ال ايه عايزنى كمان ملبسش بناطيل ضيقة و البس حاجه طويلة عليها

الفتاه الثانية : و هتسمعى كلامه الفتاه الاولى : طبعا لا

الموقف الثانى :عند اشارة مرور بشارع 23 يوليو امام المحافظة

توقف الميكروباص قالقيت بنظرى جانبى وجدت عربية ملاكى بها 3 شباب واحد فى الخلف

و اتنين فى الامام و الشاب الذى بالخلف يعطى سيجارة مولعة للشابين فى الامام

فقلت لنفسى هو فى حد اليومين دول يدى لحد سيجارة مولعة غير الا

لما تكون مليانه حشيش زى الافلام و المسلسلات فدققت النظر فوجدت فعلا

ما كنت لا اصدقه قلت لنفسى انا بهلوس و لا ايه يمكن من الارهاق بيتهيالى

و لكن بجد لقيت السيجارة كان شكلها فعلا عجيب زى الافلام

فصدمت و لم استطع فعل شئ

لماذا لا نشعر بقيمة الاحباب الا بعد الفراق

تسألت لماذا لا نشعر بقيمة الشئ الا بعد فقدانه

لماذا نتذكر الاحباب و الاصدقاء القدامى و نشتاق اليهم

لماذا عندما نعيش معهم و لا نشعر بقيمتهم الابعد رحيلهم

اشتقت الى كل من رحلوا و الى كل ماضى جميل

اشتقت الى جدتى رحمها الله , لم ادرك مدى حبى لها الا بعد وفاتها بسنوات

لماذا اتذكر كلامها لى الا بعد العديد من السنوات

فعندما توفيت كنت صغيرة لا اعى كلامها و لا اتقبل منها نصيحة

و الان و بعد مرور السنوات اتذكرها بكل خير و اطلب من الله ان يغفر لها و يرحمها

جدتى رحمها الله ما تعلمته منها لم ادركه الى بعد وفاتها

و ادركت مدى حبى لها و مدى فعلها للخير و مساعدة الناس

فعلمتنى الصبر و التقرب الى الله و الكثير من العبادات الصحيحة

كل هذا و لم ادرك مدى حبى لها و احترامها الا بعد وفاتها

اتمنى ان اشعر بقيمة كل من حولى قبل فوات الاوان

مقدمة تأملاتى

السلام عليكم و رحمة الله و بركاته

هذه أول تجربة لى فى عالم التدوين الالكترونى

فقررت ان ادون تأملاتى فى الحياة سواء كانت هذه التأملات بسيطة أو معقدة

اريد ان اشاركم تأملاتى و أفكارى لعلها تفيد فى شئ او تصحح اى مفاهيم خاطئة لدى

أتمنى ان استطيع التعبير عن ما بداخلى من تاملات

و افكار و مواقف قابلتنى و اثرت فى شخصيتى و حياتى